صحيفة نبض الشعب الاسبوعيه رئيس التحرير جعفر الخابوري

-شفتي مسلسل "رد قلبي" اللي عملته نرمين الفقي ومحمد رياض ؟
=وحش
-اداءا ولا اخراجا ؟؟
=كله وحش
كل حاجة فيها نقد أولا البرانيط اللي لابسينها ، تدخل الأوضة بالبرنيطة ، تروح الحمام تلبس البرنيطة ، تاخد دش بالبرنيطة لا يمكن يبقى كده ..
انا ملبستش ولا برنيطة في الفيلم ليه ؟
لان" رد قلبي" ده كان أخره ثورة 1952
قبل كده كان 39 ، 38 و40 وكده ، احنا كنا بنجيب البرانيط منين ؟!
من أوروبا ، سنة 1939 قامت الحرب في أوروبا هيحاربوا ويقتلوا بعض ولا هيعملوا برانيط عشان الست انجي تلبسها في حلقات رد قلبي ؟؟!
طبعا لأ هيحاربوا .. بعد الحرب 1945 هيعملوا برانيط ولا هيبنوا بلدهم ؟!
طبعا هيبنوا بلدهم فكل البرانيط اللي اتلبست في "رد قلبي" خاطئة تتشطب لانهم ناس مش دراسين
انا لما ملبستش برنيطة مش لان مكنش عندنا برانيط لأ ، انا عندي برانيط وملبستهاش لان الوقت ده مكنش فيه برانيط ده أول خطأ في المسلسل .. تاني خطأ اللبس والشابوه ده خطأ جدا ايه اللي خلاها تلبس الحاجات العجيبة دي ؟! .. تالت خطأ نرمين الفقي تخينة ، انا كنت زي البرص ، مفيش واحدة رومانسية تاكل حلة محشي وتروح تمثل الرومانسية ، الرومانسي ده مبياكلش ومسلول قاعد يحب طول النهار ولازم يبقى زي عبدالحليم حافظ او شكري سرحان او مريم فخر الدين ، مينفعش التُخان .. رابع خطأ عز الدين ذو الفقار كان يقولي أي جملة فيها حروف العين او الخاء او الضاد متقوليهاش في الرومانسية ، البطل اسمه "علي" فلازم أقول العين ، قالي قوليها نَفَس متقوليهاش بالعين الجامدة ، تعالي شوفي المسلسل العين والضاد والخاء طالعين ملعلعين ، مفيش رومانسية خالص .. خامس خطأ سلسلة القلب قلت ألبسها في الفيلم يوسف السباعي قالي لأ متلبسيهاش لان الأميرة انجي أم سوليتيرات وبتاع لما تلبس قلب فسكان جايبه علي أبو 5 جنيه في الشهر الكحيان ده ، أبويا الأمير وأخويا الأمير هيقولولي ايه الهباب اللي انتي حاطاه في زمارة رقبتك ده ويدوني قلمين .. نرمين في المسلسل اتجوزت واحد تاني وفضلت لابسة السلسلة ، انا طبعا كنت راقماها زي النسر